فاسٹ فوڈ اپنی لذت اور سہولت کے باعث تقریباً ہر کسی کو پسند آتا ہے، مگر یہ زیادہ تر تیل، نمک اور چینی سے بھرپور ہوتا ہے، جو طویل مدت میں صحت کے لیے نقصان دہ ثابت ہوسکتا ہے۔ اگر ہم اپنی خوراک میں معمولی سی تبدیلی لے آئیں تو ہم نہ صرف مزیدار بلکہ صحت مند متبادل کھانے بھی اپنا سکتے ہیں جو جسم کو ضروری غذائیت فراہم کرتے ہیں۔
فاسٹ فوڈ کے بجائے کیا کھائیں؟
پکوڑے تلنے کے بجائے: اُسی بیسن کا چِیلا (پین کیک) توے پر کم تیل میں بنایا جا سکتا ہے۔
برگر یا شوارما کے بجائے: مرغی کے تِکے تیار کریں اور انہیں گندم کی روٹی میں سلاد اور چٹنی کے ساتھ لپیٹ کر کھائیں۔
پیزا کے بجائے: بیسن کی تندوری روٹی پر سبزیاں اور گوشت شامل کرکے ایک دیسی، صحت مند “پیزا” تیار کریں۔
مچھلی تلنے کے بجائے: اسے کوئلے پر سینک لیں یا سیخوں پر بھونیں. یہ زیادہ غذائیت بخش ہوگی۔
ٹافی یا چاکلیٹ کے بجائے: کھجور یا میوہ جات کھائیں، یا کھجور کا پیسٹ بنا کر اس میں خشک میوہ شامل کریں. یہ چاکلیٹ سے زیادہ مزیدار اور توانائی بخش ہوگا۔
بازاری آئس کریم کے بجائے: خالص دودھ اور میووں سے گھر کی بنی آئس کریم تیار کریں جو کیمیکل سے پاک اور صحت مند ہوگی۔
یوٹیوب پر بے شمار ویڈیوز موجود ہیں جو گھر میں آسان، صحت مند اور مزیدار کھانے بنانے کے طریقے بتاتی ہیں، جنہیں آپ جنک فوڈ کے بجائے آزما سکتے ہیں۔
