کراچی(انڈس ٹربیون) سندھ حکومت نے صوبے بھر میں 31 مارچ سے میٹرک امتحانات کا فیصلہ کیا ہے.
یہ فیصلہ جمعرات کو کراچی میں وزیر تعلیم سندھ سید سردار علی شاہ کی زیر صدارت منعقدہ محکمہ تعلیم کی اسٹیرنگ کمیٹی کے اجلاس میں کیا گیا، جس میں تعلیمی کیلنڈر، امتحانات کے شیڈول اور موسم گرما و سرما کی تعطیلات کی منظوری دی گئی۔
امتحانات کا شیڈول اور نتائج
اسٹیرنگ کمیٹی نے امتحانات کے لیے درج ذیل ٹائم لائن مقرر کی ہے:
آٹھویں جماعت تک: امتحانات مارچ (رمضان المبارک کے دوران) منعقد ہوں گے۔
نویں اور دسویں جماعت: امتحانات 31 مارچ سے 15 اپریل تک ہوں گے۔
گیارہویں اور بارہویں جماعت: امتحانات 15 اپریل سے 30 اپریل تک لیے جائیں گے۔
نتائج: انٹرمیڈیٹ کے نتائج کا سلسلہ یکم جون سے شروع ہوگا۔
تعطیلات اور موسمیاتی تبدیلیاں
اجلاس میں طے پایا کہ موسم گرما کی تعطیلات جون اور جولائی میں ہوں گی، جبکہ موسم سرما کی چھٹیاں دسمبر کے آخری ہفتے میں دی جائیں گی۔ تاہم، موسمیاتی تبدیلیوں اور ہیٹ ویو جیسے خطرات کے پیش نظر تعطیلات میں ممکنہ ردوبدل کے لیے ایک سب کمیٹی بھی تشکیل دی گئی ہے جو مستقبل کے فیصلے کرے گی۔
امتحانی نظام میں جدید ٹیکنالوجی کا استعمال
وزیر یونیورسٹیز اینڈ بورڈز اسماعیل راہو نے اجلاس میں خصوصی شرکت کی اور تعلیمی بورڈز کو OMR (آپٹیکل مارک ریکگنیشن) سسٹم نافذ کرنے کی ہدایت دی۔ اس اقدام کا مقصد امتحانی نظام میں انسانی مداخلت کم کرنا اور شفافیت کے ساتھ نتائج کا جلد اعلان یقینی بنانا ہے۔
سید سردار علی شاہ نے مزید کہا کہ امتحانات کا مقصد صرف طلبہ کی درجہ بندی نہیں بلکہ اساتذہ کی کارکردگی کا جائزہ لینا بھی ہونا چاہیے۔ اجلاس میں غیرنصابی سرگرمیوں کو بھی تعلیمی کیلنڈر کا لازمی حصہ بنانے کی منظوری دی گئی۔
