تل ابیب/تہران (ویب ڈیسک): اسرائیل نے دعویٰ کیا ہے کہ اس نے پاسدارانِ انقلاب کی بسیج فورس کے کمانڈر غلام رضا سلیمانی کو گزشتہ رات ایک حملے میں ہلاک کر دیا ہے۔
اسرائیلی فوج کے مطابق کارروائی ایران کے کمانڈ اینڈ کنٹرول ڈھانچے کے خلاف ایک اہم اقدام ہے اور سلیمانی کی ہلاکت ایرانی نظام کے لیے بڑا دھچکا ثابت ہوگی۔ Israel Defense Forces (آئی ڈی ایف) نے کہا ہے کہ وہ ایرانی کمانڈروں کے خلاف اپنی کارروائیاں جاری رکھے گی۔
تاحال اس دعوے پر ایران کی جانب سے کوئی باضابطہ ردعمل سامنے نہیں آیا۔
غلام رضا سلیمانی کون تھے؟
1964 میں پیدا ہونے والے غلام رضا سلیمانی نے نوجوانی میں پاسدارانِ انقلاب میں شمولیت اختیار کی اور ترقی کرتے ہوئے ایران۔عراق جنگ کے دوران بٹالین کمانڈر کے طور پر خدمات انجام دیں۔ بعد ازاں انہوں نے آئی آر جی سی کی مختلف ڈویژنز کی قیادت کی۔
2019 سے وہ بسیج فورس کے سربراہ تھے، جو پاسدارانِ انقلاب کے تحت کام کرنے والی ایک نیم فوجی رضاکار تنظیم ہے، جس کے تقریباً ساڑھے چار لاکھ اہلکار بتائے جاتے ہیں۔ اس حیثیت سے وہ ایران کے داخلی سیکیورٹی نظام میں اہم کردار ادا کر رہے تھے۔
سلیمانی کو ایرانی حکومت کا مضبوط حامی سمجھا جاتا تھا، جبکہ ان پر یورپی یونین، برطانیہ اور کینیڈا سمیت متعدد مغربی ممالک اور تنظیموں کی جانب سے پابندیاں عائد تھیں۔
